1397 (n. st.), 12 janvierParis

Louis, duc de Bourbonnais etc., mande à ses gens des comptes de s'informer sur la valeur d'une maison, sise à Moulins, près de l'entrée de l'église de l'église Notre-Dame, où il a fondé nouvellement un chapitre, afin d'indemniser son propriétaire, Jean Perdrion, qui estime que les 25 francs qui lui ont été remis en récompense ne représentent que le quart de la valeur réelle de la demeure.

Loÿs, duc de Bourbonnois, conte de Clermont et de Fourez, pair et chamberier de France, a noz amez et feaulx gens de noz comptes a Molins, salut et dilection. Jehan Perdrion nous a signifié comme il eust un hostel assis en nostre ville de Molins, pres de l'entree de l'eglise de Nostre Dame ou nous avons de nouvel fondé un colliege, dont il avoit chascun an quatre florins de rente, lequel hostel nous avons fait prendre et desmolir pour avoir plus grant place devant ycelle entree pour le bien et utilité dudit colliege, et affin que plus aiseement le peuple qui y vient et afflue a jours solennelz et de feste puisse entrer et yssir sanz presse en ycelle eglise, et le merrien et treulle d'icellui hostel ait esté vendu quinze frans ou environ qui ont esté mis et convertis a nostre profit, et vous eussions ordonné de tauxer ce que le dit hostel et place ou il estoit situé povoient valoir et a lui en fere recompensacion convenable, neantmoins vous ne li voulez pour ce fere paier que vint cinq frans pour une foiz qu'il ne seroit pas plus de la quarte partie de ce qu'il en doit avoir raisonnablement, qui seroit en son grant prejudice et dommaige si comme il dit, requerant sur ce estre par nous convenablement pourveu. Pour quoy, attendu ce que dit est, voulans ledit signiffiant estre sur ce raisonnablement récompensé comme raison est, vous mandons et commectons se metier est que appellez sur la place ou le dit hostel estoit seant ceulx qui feront

sic pour seront.

a appeller, et vous informé bien et diligemment des choses dessus dictes, circonstances et deppendences d'icelles fectes au dit signiffiant de ce telle et si digne recompensacion que vous verrez estre faisable, de laquelle le faictes paier et agreer par nostre tresorier de Bourbonnois tellement qu'il en soit content en aloant a nostre dit tresorier par le rapport de ces presentes aveques certifficacion de vous et quictance du dit signiffiant, et rabatant de sa recepte tout ce que paié lui aura pour ceste cause sanz contredit aucun, non obstant ordenances, mandemens ou deffenses a ce contraires. Donné a Paris soubz nostre seel secret, le XIIe jour de janvier, l'an mil CCC IIIIXX et seze.