1393, 16 juinMontbrison

Louis, duc de Bourbonnais etc., nomme Mathieu Guionet, prêtre chanoine de l'église collégiale de Montbrison, membre de la Chambre des comptes de Forez en remplacement de feu Odin Cleppier.

Loÿs, duc de Bourbonnois, conte de Clermont et de Fourés, per et chamberier de France, a touz ceulx qui ces presentes lettres verront, salut. Savoir faisons que, pour le bon et notable rapport qui nous a esté fait des sens, loyauté, suffisance et diligence de nostre amé messire Mathieu Guionet

Mathieu Guionet est encore conseiller à la Chambre des comptes de Montbrison en 1408 : Archives départementales Loire, B 1837, fol. 35v-36 et 41.

, prestre chanoyne de nostre eglise de Montbrison, ycellui avons mis et ordonné, mectons et ordennons par ces presentes en nostre chambre dez comptes en Fourés en tel honneur et estat comme y estoit feu messire Odin Cleppié, ja pieça trespassé, a tieulx gaiges comme par les gens de nostre conseil sera ordonné es premiers comptes en nostre païs de Fourés. Si donnons en mandement a nostre bailli de Fourés que ledit messire Mathieu, duquel nous avons receu le serment acoustumé en ce cas, mecte et institue realment en nostredicte chambre au lieu dudit feu messire Odin avecques noz autres gens de nostredicte chambre. Mandons aussi a nostre tresorier de Fourés que les gaiges, qui par les gens de nostredit conseil seront ordonnés audit messire Mathieu, lui paye chascun an aux termes acoustumés, et par rapportant vidimus de ces presentes et certifficacion des gens de nostredit conseil de l'ordonnance qui par eulx sera sur ce faicte une foiz seulement et quictance dudit messire Mathieu, nous voulons et mandons ce que payé en sera estre alloué es comptes de nostredit tresourier par noz amez et feaulx gens de noz comptes, sans aucun reffus ou contredit. En tesmoing de ce, nous avons fait mectre nostre seel a ces presentes. Donné a Montbrison, le XVIe jour de juing, l'an de grace mil CCC IIIIXX et treze.