1373, 10 décembreMontbrison

Louis, duc de Bourbonnais etc., nomme Jean Brunon, de La Tour-en-Jareys, sergent général de son comté de Forez.

Loÿs, duc de Bourbon, conte de Clermont et de Fourois, per et chambrier de France, a touz ceulx qui ces presentes lettres verront, salut. Savoir faisons que nous, confianz a plain du senz, loyauté et bonne diligence de Jehan Brunon, de la Tour, porteur de ces presentes, ycellui Jehan avons fait, ordené et establi, faisons, ordenons et establissons notre sergent general en et parmi nostre terre et conté de Fourois et ressors d'icelle tant comme il nous plaira, aux gaiges, proffis et emolumens accoustumez ; auquel Jehan nous avons donné et donnons par ces presentes plain povoir, auctorité et mandement especial de citer, ammonester, adjourner, arrester, saysir, prendre brandement

Dans le sens de "brandonement", à savoir la saisie d'un héritage en l'absence de paiement du cens. Une telle saisie se marquait par l'enfoncement d'un brandon dans la terre, d'où le mot : F. Godefroy, Lexique de l'ancien français, p. 63 ("brandonement").

de avour, demander, obtenir et requerre l'adveul, la court et congnoissance de noz hommes et femmes, bourgois et bourgoises et subgez et la delivrance et retrance de leurs corps et biens par devant touz juges, et generalment de fere et exercer toutes et singulieres choses qui a office de bon et loyal sergent appartient a fere de raison et de droit. Si donnons en mandement a nostre bailli de Fourois qu'i en prenant le serment dudit Jehan de bien et loyaument exercer ledit office de sergenterie que il le laisse et seuffre user et joïr paisiblement dudit office. Mandons et commandons a touz noz autres justiciers et subgez que audit Jehan comme a notre sergent general en et parmi nostredicte conté et ressort d'icelle en faisant et exercent deuement sondit office de sergenterie obeïssent diligement et entendent, et lui donnent et prestent conseil, confort et aide se mestier en a et par lui il en soient requis. Donné en notre ville de Montbrison, soubz notre seel, le X jour de decembre, l'an mil CCC LXXIII.