Loÿs, duc de Bourbonnois, conte de Clermont et de la Marche, chamberer de France, a nostre baillif de Bourbonnois, salut. Comme nostre amé et feal messire Chatart, sire de Saint Germain, chevalier, nous ait supplié et requis que nous li voussisseins otroyer de grace especial deux foyres en l'an en sa ville de Fretay, laquelle et les appartenences il tient de nous en fié, si vous mandons et a ce fere si mestier est commectons que vous en vostre persone vous transportez audit lieu de Fretay et fectes appeller de plus notables persones des villes et lieux circumvoisins, et si vous trovez que ledit lieu soit convenables et que lesdictes foyres soient neccesseres et proffitables au pays estre audit lieu de Fretay et sanz prejudice de nous, vous lesdictes deux foyres li fectes et assignez en sadicte ville de Fratay a deux certains jourz ensi comme vous semblera bon et par le conseilh de ceulx du paÿs, quar ce nous li avons otroyé de grace especial. Donné a Molins, soubz notre seel, le penultime jour de fevrer, l'an mil CCC cinquante et six.