1410, 30 juinMontbrison

Louis, duc de Bourbonnais etc., mande à son bailli et officiers de Beaujolais de révoquer toutes les souffrances d'hommage qu'il avait octroyées à ses vassaux, ainsi que les dispenses de la contribution pour l'entretien du château de Beaujeu, et de faire transporter au château de Thizy, en vue de les employer à la reconstruction du donjon, les matériaux provenant des ruines de la tour du marché de cette ville, dont certaines personnes se sont emparés.

Loÿs, duc de Bourbonnois, conte de Forez et seigneur de Beaujeu, per et chamberier de France, a noz amez et feaulx les bailli, juge, gens de noz comptes et tresorier de Beaujeuloiz, a Perronin Rosset, nostre procureur sur le fait de noz fiefz oudit païs, et a touz noz autres justiciers et officiers ou a leurs lieuxtenants, salut. Comme nous aions donné a plusieurs personnes de nostredit païs de Beaujeuloiz, c'est assavoir aux uns certains respis et seuffrance de non faire le foy et hommaige des choses que ilz tenoient de nous en fief, es autres de non paier et contribuer les finances que ilz devoient a cause de la reparacion de nostre chastel de Beaujeu

Beaujeu : Rhône, ar. Villefranche-sur-Saône, ch.-l. c.

, et aux autres de non paier les deniers que ilz nous devoient jusques a nostre premiere venue en nostredit païs de Beaujeuloiz, ouquel païs nous avions lors esperance de briefment aller, et il soit ainsi que, pour aucunes besoingnes et affaires qui nous sont survenus, nous ne puissons aller a present en nostredit païs ne si briefment que nous avions fiance ou temps que nous donnasmes lesdiz respis, et pour ce, pour le retardement de nostredicte venue oudit païs, par le moien desdiz respiz serions en voye de perdre noz droiz, savoir faisons que, pour les causes dessus dictes et pour certaines autres causes a ce nous mouvans, nous avons cassé, revocqué et anullé, et par ces presentes cassons, revocquons et anullons touz les respis et seuffrances par nous donnees et octroiees, tant de non faire les foy et hommaige des choses de nous tenues en nostredit païs comme de non contribuer a la reparacion de nostredit chastel de Beaujeu, et aussi de non paier les finances a nous deues comme dit est, et aucunement et en quelque maniere que ce soit ; toutes voies, quant est auxdiz fiefz, nous voulons bien que ilz soient tenuz en respit en nous baillant prestement leur nommee ou denombrement mais non autrement. Si vous mandons et a chascun de vous si comme a lui appartiendra que touz les respis dessus diz, vous faictes casser et annuler et n'en seuffrez aucunement joïr ceulx qui les ont obtenues de nous, mais faictes tenir et acomplir le contenu en ces noz lettres senz les enfraindre en aucune maniere. Et avecques ce vous mandons que toute la pierre de la tour du marchié de Thise

Auj. Thizy-les-Bourgs : Rhône, ar. Villefranche-sur-Saône, ch.-l. c.

qui est choiste et dont plusieurs gens en ont prins grant partie, laquelle voulons estre restituee, vous faictes mener et porter en nostre chastel de Thise pour en haulcier et appareiller la tour de nostre donjon d'ilec. Car ainsi nous plaist il estre fait. Donné a Montbrison, le derrier jour de juing, l'an de grace mil quatre cens et dix.