Loÿs, duc de Bourbon[nois], conte de Clermont et de Forez, par et chambrier de France, a nos amez et feaulx Jehan Frenier, nostre baillif, et a maistre Jehan, nostre juge de Forez, salut. Nous vous mandons et commettons par les presentes que vous reciviez la information que nos amez et feal le doyen et chapitre de Montbrison vous feront des sommes de rentes ausmonees qui sont donnees a ladite eglise pour les legats de bonne memoire les comtes de Foureis et aussi ce que ils vous informeront deuement a eux etre deub et accoutumé de payer, les assignez et faites payer incontinant, et de ce que vous trouverez a eux etre deub et les assignerez, nous voulons et mandons par les presentes a noz amez et feaux gens de nos comptes a Montbrison, que rapportant ces presentes avec certification et assignation et confession desdits doyen et chapitres, les sommes a eux deues ainsi assignees et payees, allouons ez comptes de celui ou ceux sur qui vous les assignerez. Donné en notre ville de Montbrison, sous notre seel, le XIXe jour de decembre, l'an mil CCC LXXIII.