1395, 22 novembreParis

Louis, duc de Bourbonnais etc., nomme maître Pierre de Cluny bailli des terres et châtellenies de Château-Chinon et de Lorme, naguère à lui cédées par le roi, aux gages de 50 livres tournois annuelles, et mande à Pierre de Norry, son lieutenant général, de l'instituer dans l'office.

Loÿs, duc de Bourbonnois, conte de Clermonnt et de Fourez, pet et chamberier de France a touz ceulx qui ces lettres verront, salut. Savoir faisons que nous, confians a plain du sens, loyaulté et bonne diligence de maistre Pierre de Clugny, icellui avons fait, retenu, ordonné et establi, faisons, retenons, ordonnons et establissons par la teneur de ces presentes nostre bailli en noz terres et chastelleniez de Chasteauchinon

Château-Chinon : Nièvre, ch.-l. ar.

et de Lourme

Lormes : Nièvre, ar. Clamecy, ch.-l. c. Corbigny.

et es autres terres quiexcunques a nous nagueres cedees et transpourtees esdictes parties par monseigneur le roy aux gaiges ou pension de cinquante livres tournois par an ; et lui avons donné et donnons par ces meismes povoir et auctorité dudit office de baillif excercer en la maniere acoustumee, et de y fere tout ce qui a bon et loyal bailli compecte et appartient de fere tant comme il nous plaira. Si donnons en mandement a nostre amé et feal chevalier et conseiller le sire de Norry, general gouverneur de nozdiz païs que, receu dudit maistre Pierre le serement en tel cas acoustumé, il, par la traddicion des feaulx dudit bailliage a lui fecte, le mecte et institue en possession et saisine paisible dudit office, mandons aussy a nostre receveur dudit Chasteauchinon present et advenir que les gaiges dessus dis il paie, balle et delivre doresenavant audit maistre Pierre ou a son certain mandement auz termez et en la maniere acoustumez, et par rappourtant ces presentes ou vidimus d'icelles par soubz seel autentique pour la premiere foys et quictance sur ce, nous voulons tout ce que a la cause dessus dicte paié lui aura esté sanz contredit alloué es comptes de la recepte de cellui ou ceulx qui paié l'aura ou auront par nouz amez et feaulx conseillers les gens de noz comptes a Molins sanz contedit aucun, non obstant mandemens ou deffenses au contraires. En tesmoing de ce, nous avons fait mectre nostre seel a ces presentes. Donné a Paris, le XXIIe jour de novembre, l'an de grace mil CCC IIIIXX et quinze.