1386 (n. st.), 21 avrilParis (Saint-Chapelle)

Philippe, fils de roi de France, duc de Bourgogne etc., et Louis, duc de Bourbonnais, etc., s'engagent à observer les termes du traité convenu entre eux pour le mariage de leurs enfants, Bonne de Bourgogne et Jean de Bourbon. Par cet accord, le duc de Bourbon s'engage à donner à son fils 4 000 livrées de terre et le duc de Bourgogne 5 000 livrées, qui constitueront l'héritage des enfants à naître dudit mariage.

Nous Phelippe, filz de roy de France, duc de Bourgoigne, conte de Flandres, d'Artoiz et de Bourgoigne palatin, sire de Salins, conte de Rethel et seigneur de Malines, et nous Loÿs, duc de Bourbonnois, conte de Forez et de Clermont, per et chamberier de France, faisons savoir a touz que par l'ordenance et voulenté de nostre seigneur le roy et par le conseil des seigneurs de nostre sanc et lignaige, nous avons traictié, accordé et proumis le mariage d'entre damoiselle Bonne, fille de nous, duc de Bourgoigne, d'une part, et de Jehan, filz de nous, duc de Bourbonnois, d'autre part, en la forme et maniere contenue en une cedule par nous passee et juree es mains de hault et puissant prince Jehan, duc de Berry, frere de nous, duc de Bourgoigne, et cousin de nous, duc de Bourbonnois, en la presence de reverent pere en Dieu le cardinal de Laon, des chancelliers de France et du Dalphiné, et de pluseurs autres conseilliers de chascun de nous, de laquelle cedule la teneur s'ensuit : C'est le traictié qui est accordé entre haulz et puissans princes monseigneur le duc de Bourgoigne, conte de Flandres, d'Artoiz et de Bourgoigne, et monseigneur le duc de Bourbonnois, sur le mariage de damoiselle Bonne, fille dudit monseigneur le duc de Bourgoigne, et de Jehan, filz dudit monseigneur le duc de Bourbonnois. Premierement que, obtenue dispensacion convenable de nostre saint pere le pape, ledit Jehan prandra a feme et espousera ladicte Bonne en face de sainte Eglise tantost que lesdiz Jehan et Bonne seront en aage de contraire mariage. Item que a l'eurre dudit mariage, ledit monseigneur de Bourbon donra audit Jehan, son filz, quatre mile livres tornois de terre pour en joÿr plainement tantost que ledit mariage sera consummé, et l'en fera recevoir en foy et homage, possession et saisine, lesquelles quatre mile livres de terre seront heritage dudit Jehan et des enfans qui seront procreez dudit mariage, et seront assises en un ou deux païs au plus, en lieux convenables, entretenans au plus prez que faire se pourra bonnement quant a ce qui sera assiz en chascun païs ; et sera faicte ladicte assiette selon les coustumes des païs es lieux esquelz lesdictes terres seront assises, sanz compter en assiete les chasteaulx et ediffices estans en ycelles terres, lesquelz toutevoies seront baillez sanz pris audit Jehan avec les terres appartenant a yceulx qui baillez seront a ladicte assiete. Item que aprés le decez dudit monseigneur de Bourbon et de madame la duchesse, leurdit filz, se il les survit, sera leur heritier principal et leur succedera en la duché de Bourbonnois et es contez de Forez et de Clermont et en leurs autres terres et seigneuries ; et ou cas que ledit filz yroit de vie a trespassement, delaissiez aucuns enfans masles procreez dudit mariage, vivans lesdiz monseigneur et dame de Bourbon ou l'un deulx, l'ainsné filz d'icellui mariage representera son pere et succedera esdictes duché, contez et seigneuries pareillement comme eust fait le pere s'il eust survesqu lesdiz monseigneur et dame de Bourbon, non obstans coustumes, usages ou autres empeschemens a ce contraires ; et ou cas que ledit Jehan mourroit, vivans lesdiz monseigneur et dame de Bourbon, ses pere et mere ou l'un d'eulx, sanz hoir masle proucree dudit mariage delaissiees filles, et que lesdiz monseigneur et madame de Bourbon ou temps de leur decez n'auroient aucuns enfanz masles, supposé qu'il eussent filles, la fille ainsnee dudit Jehan qui seroit trespassé respresenteroit son pere et succederoit esdictes duché, contez et seigneuries comme dit est. Item se il advenoit que ledit Jehan mourust, vivant son pere, sanz hoirs masles procreez dudit mariage delaissiees filles, et que ledit monseigneur de Bourbon eust un autre filz qui feust son heritier principal, en ce cas se dudit mariage demouroit une fille seule, elle auroit oultre les quatre mile livres de terre dessus dictes, dix mile franz ; et se il en y avoit deux ou pluseurs, elles auroient vint mile franz avecques lesdictes quatre mile livres de terre pour avancier leurs etaz et aidier a leurs mariages, lesquelz deniers l'eritier principlal dudit monseigneur de Bourbon seroit enu de paier. Item se ledit Jehan ou aucun de ses enfans est heritier principal dudit monseigneur de Bourbon esdictes duché, contez et seigneuries, il pourra apanner raisonnablement ses freres et sueurs ou enfans dudit monseigneur de Bourbon sans diminucion ne prejudice du douuaire de ladicte damoiselle Bonne, tel comme cy aprés sera dit. Item se il advenoit que Dieux ne vueille que ledit Jehan mourust sanz hoirs procreez dudit mariage ou que les enfans qui seroient proucreez d'icellui mariage mourussent sanz enfans proucreez de leur cher naturelz et legitimes, lesdictes duché de Bourbonnois, contez de Forez et de Clermont retourneroient a la ligné des coustez de Bourbon dont elles seroient descendues, se autrement n'en estoit ordené par testament ou darriere voulenté de cellui qui en seroit seigneur. Item quant au douuaire de ladicte damoiselle Bonne, se elle survit, ledit Jehan qui voise de vie a trespas, vivant ledit monseigneur de Bourbon son pere, elle sera douuee de deux mile et cinq cenz livres de terre tornois a prandre sur l'eritage de son mari qui ly doit estre baillé comme dit est, ensemble les chasteaulx, forteresses et ediffices qui seront en ycelles terres, lesquelz ly seront baillez sanz priz ; et en ce cas, aprés le decez dudit monseigneur de Bourbon, se aucuns des enfans proucreez du mariage duquel l'en traicte n'estoient heritiés principaulx dudit

du répété.

monseigneur de Bourbon, ladicte damoiselle auroit encores pour son douuaire autres deux mile et cinq cenz livres tornois de terre, tant sur l'eritage qui auroit esté de son mari comme de cellui de sesdiz pere et mere, ensemble les chasteaulx, forteresses et edifices sanz priz comme dit est. Item se ledit Jehan est heritier principal dudit monseigneur de Bourbon son pere es duché, contez et seigneuries dessus dictes ou que aucun des enfans proucreez dudit mariage en soit heritier principall

sic.

, ladicte damoiselle sera douuee quant aux seigneuries et terres assises en païs coustumier de tel douuaire coustumier comme il appartendra selon les coustumes des païs et lieux ou les seigneuries et terrres seront assises ; et en tant qu'il touche la conté de Forez qui est assise en païs de droit escript, se dudit mariage ne sont proucreez aucuns enfans qu'il y ait des filles sanz masles, ladicte damoiselle aprés le decez de madame de Bourbon, mere dudit Jehan, aura en oultre pour son douuaire les terres de Ronoys, c'est assavoir Saint En

Saint-Haon-le-Châtel : Loire, ar. Roanne, c. Renaison.

, Croiset le Chastel

Le Crozet : Loire, ar. Roanne, c. Renaison.

et Rouenne

Roanne : Loire, ch.-l. ar.

avec les appartenances. Et se dudit mariage yssoit un filz et que ou temps que le douuaire auroit lieu il feust aagié de quatorze ans, ladicte damoiselle n'auroit aucun douuaire en ladicte conté de Forez, mais prandroit son douuaire tel comme dit est en païs coustumier seulement ; et se le masle proucree dudit mariage, ou temps que le douuaire auroit lieu, estoit pupille, ladicte damoiselle aprés le decez de madicte dame de Bourbon tendroit en douuaire lesdictes terres de Ronoys dessus declairees et leurs appartenances jusques a ce que son filz fust aagiez de quatorze ans acomplis, et lors elle delaisseroit le douuaire de ladicte conté de Forez. Item en tant qu'il touche ledit monseigneur de Bourgoigne, il donra a sadicte fille a l'eurre dudit mariage cinq mile livres de terre tournois soubz le ressort du roy sanz moien et aussi du fié du roy sans moyen ou de l'Eglise, qui seront propre heritage de sadicte fille et des enfans procreez dudit mariage, lesquelles cinq mile livrees de terre seront assises et en sera mis et receu en foy et hommage, possession et saisine, ledit Jehan tantost ledit mariage consummé en un ou en deux païs en lieux convenables et entretenans ou au plus prés selon les coustumes des paÿs et des lieux ou les terres seront assises, sanz compter chasteaulx, forteresses et ediffices an assiete, lesquelz toutevoies seront baillés sans priz avec les terres appartenant a yceulx qui baillees seront en assiete pareillement comme dit est du cousté dudit Jehan. Et est reservé a ladicte damoiselle que, ou cas que ledit monseigneur de Bourgoigne et madame la duchesse sa femme mourroient sanz hoir masle proucree de leur corps, ladicte damoiselle en ce cas et non autrement puist venir a leur succession selon la coustume des païs par raportant de ce qui donné ly aura esté en mariage ce qu'elle devra raporter par les coustumes des païs. Et s'il advenoit que ladicte fille ou les hoirs qui seront proucreez dudit mariage aloyent de vie a trespas sanz hoir proucree de leurs corps, toutes les terres de ladicte fille retourneroient a la lignee et aux coustez de ses pere et mere dont lesdictes terres seroient descendues, sauf que ladicte fille ou ses hoirs qui seroient seigneurs desdictes cinq mile livrees de terre en tout ou en partie en pourroient ordener en leurs testamens ou darriere voulentez de teles porcions qu'il est acoustumé es païs et lieux esquelz lesdictes terres seront assises. Item avec ce, ledit monseigneur de Bourgoigne donra a sadicte fille la somme de cinquante mile franz d'or, desquelz les trente mile franz seront convertiz et emploiez en terres qui seront le propre heritage de ladicte fille et enfans proucreez dudit mariage de la nature et condicion des cinq mile livrees de terre dessus dictes ; et les autres vint mile franz seront meuble audiz mariez pour en faire leur voulenté ; et parmi ce, ladicte fille sera contente des successions de pere et de mere ou cas que aprés leur decez il auront hoir masle. Toutes lesquelles convenances et chascune d'icelles, lesdiz monseigneur de Bourgoigne et monseigneur de Bourbon et chascun d'eulx en tant qu'il leur touche et puet toucher promectent par les foiz de leurs corps et soubz obligacion de touz leurs biens tenir, enteriner et acomplir de tout leur povoir sanz fraude ou mal enging. Et en oultre promet ledit monseigneur de Bourgoigne faire consentir et accorder toutes et chascune les choses dessus dictes par madame la duchesse sa femme, et aussi promet ledit monseigneur de Bourbon les faire consentir et accorder par madame la duchesse sa femme et par madame la contesse de Forez. Et que ce soit ferme chose et estable a tousjours mais, nous avons fait mettre noz seelz a ces presentes. Ce fu fait en la saincte chapelle du palaiz de nostredit seigneur le roy a Paris, le XXIe jour d'avril, l'an de grace mil CCC quatre vins et cinq avant Pasques.