[1453], 24 décembreCulan

Charles, duc de Bourbonnais et d'Auvergne, faisans réponse à une lettre des gens de son conseil en Forez, les mande de commettre Pierre du Says, procureur de Forez, au gouvernement des seaux du comté jusqu'à ce qu'ils soient adjugés au plus offrant au cours d'enchères qui auront lieu le 8 janvier suivant. Le duc se dit content des résultats de la journée au sujet du pays de Chamaret.

A noz amez et feaulx les balli et autres de nostre conseil en Fourez.

Le duc de Bourbonnois et d'Auvergne. Noz amez et feaulx, nous avons veu les lettres que escriptes nous avez touchant le fait de l'estrousse de noz seaulx grant et petit. Si vous mandons que a regir et gouverner nosdiz seaulx vous comectés Pierre du Says, nostre procureur de Fourez, jusques a ce que l'estrousse d'iceulx sera affermee et passee entierement, laquelle extrousse vous mandons que faictes assignez au VIIIe jour de janvier prouchain venant a Montbrison par davant vous au plus offrant et dernier encherissant, retenu et reservé tiercement dedans VIII jours et doblement dedans XV jours amprés ledit jour de l'estrousse et sur tout nostre plaisir et decret, et est nostre voulenté que le fermier a qui demoura ladite cause viendra lesdiz XV jours passés quant nostredit decret ou permis aura. Et aussi aura les deniers qui echeront es mains dudit Pierre du Says depuis le jour de Noël prochain jusques au jour de ladicte extrousse et delivrance. Nous vous avons escript que estions contens que tenusses journee avec ceulx de-la touchant le païs de Chamaray si le fait sellon la teneur de noz lettres. Noz amez et feaulx, nostre seigneur soit garde de vous. Escript a Culant, le XXIIII jour de decembre.