1453, 19 juinMoulins

Charles, duc de Bourbonnais et d'Auvergne, etc., nomme Guihaudon Meton, de Sury-le-Comtal, à un des offices de greffe de la cour de Forez.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plain des sence, loyaulté, science, prudence, prudomie et bonne diligence, et par le bon rapport et tesmoignage qui nous a esté fait de la personne de nostre bien amé Guilhaudon Meton, de Sury le Comtal, a icellui avons donné et octroyé, donnons et octroyons de grace especial par ces presentes, ung des offices de greffe de nostre court de Fourez, pour icelluy office avoir, tenir et excercez aux gages, droiz, prouffiz, prerogatives et esmolumens acoustumés et audit office appartenans, tant qu'il nous plaira. Si donnons en mandemment par ces presentes a nostre amé et feal president de Fourez et a son lieutenant que, pris et receu dudit Meton le serement acoustumé de fere en tel cas, il le mete et institue, ou face mectre et instituer, en possession et saisine dudit office de greffe, et d'icellui ensemble desdiz droiz, proufiz, prerogatives et esmolumens acoustumés, le face, laisse et seuffre joïr et user plainement et paisiblement, si il est a ce ydoene et souffisant, sanz lui fere mettre ou donner aucun destorbier ou empechement ou contrayre. En tesmoing de ce, et a plus grant fermeté, nous avons fait mettre et apposer a ces presentes nostre seel. Donné en nostre ville de Molin le XIXe jour de juign, l'an de grace mil CCCC cinquante et trois.