Nous Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui ces presentes lettres orront et verront. Savoir faisons que comme par consideracion des grans biens et beneffices que nostre createur nous a donnez en ce monde, nous aions par nostre devocion et acroissement du divin office fondé et institué en nostre testament et darriere voulunté trois petites messes de Nostre Dame estre dictes et celebrees chascune sepmaine tous les ans a tousjours mais en l'eglise Nostre Dame de ChappesChappes : Allier, ar. Montluçon, c. Commentry.
pour nostre entencion, et a la fin de chascune d'icelles messes faire commemoracion pour les mors, pour lesquelles messes nous ayons donné et assigné au prieur, religieux et curé dudit prioré ensemble [ung autre] prestre serviteur en ladicte esglise, la somme de douze livres tournois a prandre et avoir chascun an sur nostre terre et recepte d'UsselUssel-d'Allier : Allier, ar. Moulins, c. Gannat.
comme en nostredit testament est a plain contenu, ainsi est il que presentement nous, desirans icellui nostre testament et darriere voulunté acomplir et enteriner, nous estant en vie, quant ad ce des maintenant fondons, instituons et ordonnons en ladicte esglise lesdictes trois petites messes estre dictes et celebrees doresenavant par la forme et maniere que dessus est dit, desquelles religieuse personne frere Pierre Guy, prieur dudit lieu de Chappes pour lui, ses religieux, curé et prestre et leurs successeurs, a prins la charge de faire dire et celebrer icelles messes par la voulunté, licence et consentement du prieur de Souvigny, son maieur, a la pencion annuelle desdictes douze livres tournois, lesquelles lui avons donné et assigné comme dessus sur nostre terre et recepte d'Ussel aux termes, c'est assavoir la moité a la feste de la Nativité nostre Seigneur, et l'autre moitié a la Nativité saint Jehan Baptiste pour raison et a cause de la fondacion et institucions dessus dictes. Si donnons en mandement a noz amez et feaulx conseilliers les gens et auditeurs de noz comptes en Fourez et autres a qui il appartiendra que, prins et receu le serement et promission dudit prieur dehue et appartenant oudit cas et registré en nostre chambre desdiz comptes, audit prieur pour lui et les dessus nommez facent paier, finer et delivrer un chascun an par nostre receveur d'Ussel, qui a present est et pour le temps ad venir sera, ladicte somme de douze livres tournois aux termes et pour les causes cy dessus esprimees, en rebattant et deduisant audit receveur ladicte somme, parmi rapportant vidimus de ces presentes pour la premiere fois et quictance dudit prieur et les dessus nommez chascun an en ses comptes sans aucun contredit. Car ainsi nous plaist il estre fait, non obstant quelxconques ordonnances, mandemens ou deffenses a ce contraires. Et afin que ce soit ferme chose et estable a tousjours, nous avons fait mettre nostre seel a ces presentes. Donné au chastel de Molins, le vint troisieme jour du moys d'octobre, l'an de grace mil CCCC et seze.