1443, 15 décembreMoulins

Quittance d'Agnès, duchesse de Bourbonnais et d'Auvergne, etc., à Pierre Mandonier, receveur du bas pays d'Auvergne d'une aide de dix mille cinquante-huit francs, de la somme de quatre cent cinquante livres tournois accordée par les gens d'église et nobles dudit pays.

Nous Agnes de Bourgoigne, duchesse de Bourbonnois et d'Auvergne, contesse de Clermont et de Forez, dame de Beaujeu et de Chastiau Chinon, congnoissons et confessons avoir eu et receu de Pierre Mandonier, receveur pour monseigneur le roy en nostre bas païs d'Auvergne de la porcion appartenant audit bas païs de l'aide de XLVIIIM f. octroyé a mondit seigneur le roy par les gens d'eglise et nobles de nostredit païs pour ce assemblez en la ville de Rion es moys de may et aoust dernier passez, la somme de quatre cens cinquante livres tournois, laquelle somme lesdiz gens d'eglise et nobles dudit bas païs nous ont donnee et ordonnee estre païee, baillee et delivree par ledit receveur des deniers de sa recept, mis sus oultre et par dessus l'octroy principal dudit aide pour les causes plus a plain contenues et declairees es instructions et ordonnances d'icelluy païs fectes et passees par lesdiz gens d'eglise et nobles de nostredit bas païs a l'octroy dudit aide, de laquelle somme de IIIIC L livres tournois nous nous tenons pour contente et bien païé, et en avons quittié et quittons ledit receveur et tous autres a qui quittance en puet et doit appartenir. Donné en nostre ville de Molins, soubz nostre seel, le XVe jour de decembre, l'an de grace mil quatre cens quarante trois.