1411, 20 juin Bourges

Jean, fils de roi de France, duc de Berry et d’Auvergne, etc., lieutenant du roi, à la suite des empiètements commis par son sénéchal de Berry Louis de Bosredon et d'autres officiers sur la juridiction de l'église cathédrale de Bourges, le sénéchal ayant fait extraire Jean Emenion, écuyer, accusé de maléfice et prisonnier de l'hôtel du chapitre pour le faire incarcérer dans le territoire soumis à sa juridiction, rappelle les droits et immunités de l'église qui est de fondation royale, et dont le ressort est délimité par l'enceinte du cloître, met au néant les dispositions prises par le sénéchal, et mande à ses officiers de respecter la juridiction de l'église à l'avenir.

Jehan, filz de roy de France, duc de Berry et d'Auvergne, conte de Poictou, d'Estampes de Bouloigne et d'Auvergne, lieutenant de monseigneur le roy en nozdiz pays de Berry, Auvergne et Poictou ou pays de Languedoc et duchié de Guienne, a tous ceulx qui ces presentes lettres verront, salut.

Comme noz bien amez le doyen et chappitre de l'eglise cathedral de Bourges nous ayent fait exposer que ladicte eglise soit de fundacion royal et que a cause de la fondacion et doctacion d'icelle entre les autres droiz et demaines de ladicte eglise ilz, ou nom et a cause d'icelle eglise, soient seigneurs, aient, et soient en possession et saisine de toute justice, jurisdicion temporelle, haulte, moyenne et basse, et l'exercice d'icelle par leur baillif, prevost, sergent et autres officiers et ministres de leurdicte justice temporelle ou cloistre de ladicte eglise et hostelz canoniaulx estans dedans la pourprise, circuite et clausure d'icellui cloistre selon ce que icellui cloistre se extend et comporte nuement

Directement, sans intermédiaire (DMF).

soubz le ressort et souveraineté de monseigneur le roy ou bailliage de Saint Pere le Moustier

Saint-Pierre-le-Moûtier, Nièvre, ch.-l.cant.

, au lieu et siege de Centquoins

Sancoins, Cher, ch.-l. cant.

, voires qui plus est jurisdicion sperituelle par leur officier et autres ministres d'icelle jurisdicion sperituelle nuement subjecte a la court de Romme ; et que neantmoins nagaires, c'est assavoir en cest present mois de juing l'an mil CCCC et unze, nostre amé et feal chevalier et chambellant Loys de Boresdont, nostre senechal de Berry

Issu d'une famille noble d'Auvergne, Louis de Bosredon est encore sénéchal de Berry en 1415 (René Lacour, Le gouvernement de l'apanage de Jean, duc de Berry (1360-1416), Paris, Auguste Picard, 1934, annexe, p. xxvi). Homme de guerre, il est un actif capitaine du parti armagnac en 1412-1415 (Françoise Lehoux, Jean de France, duc de Berri. Sa vie, son action politique (1340-1416), vol. III, De l'avènement de Jean sans Peur à la mort du duc de Berri, Paris, Picard, 1968, p. 296, 313, 316, 345 et 346).

, estant loigé en l'ostel de maistre Jehan de Chery, chanoine de ladicte eglise, oudit cloistre de Bourges, pourprise, circuite et clausure d'icellui, Jehan Emenion, escuier estant oudit hostel pour certain cas ou malefice que l'on disoit ou supposoit estre eu fait, commis et perpetré par ledit Jehan Emenion escuier ou autrement, mist ou fist mectre main oudit Emenion et lui commanda ou fit commander sa prison en noz prisons de nostredit lieu et justice de Bourges, nostredit senechal et Emenion, Guillaume Labbé, Jehan Valentin, Bernart du Dezer, Jehan Bergier, Raymon Damperre, noz sergens et officiers ou autres noz sergens et officiers estans oudit hostel canonial, oudit cloistre de Bourges, icellui nostredit senechal par son commandement fait de par nous fit mectre oudit Emenion et icellui prandre oudit hostel canonial et cloistre et jurisdicion de ladicte eglise de Bourges par nozdiz sergens ou autres noz officiers et ministres de nostredicte justice de Bourges, traire et transporter ledit Emenion hors dudit hostel, cloistre et juridicion de ladicte eglise, et icellui enmeurer en noz prisons de nostredicte justice de Bourges en nostredicte ville ou grant prejudice desdiz doyan et chappistre de ladicte eglise, de leurdicte justice et jurisdicion et des droiz et immunité d'icelle eglise et plus seroit si sur ce ne leur estoit pourveu de provision convenable.

Savoir faisons que nous, sur ce oÿ le rapport de nostredit senechal lequel, si comme il nous a dit, ignoroit ladicte jurisdicion et droiz de ladicte eglise de Bourges lorsqu'il fist et fist faire lesdiz exploiz, saichans et acertenez lesdiz doyen et chappitre de ladicte eglise cathedral de Bourges et icelle eglise estre de fundacion et doctacion royal et cause de ladicte fondacion et doctacion royal d'icelle eglise lesdiz doyen et chappistre a cause que dessus avoir droit et estre en possession et saisine de ladicte justice et exercice de justice et jurisdicion temporelle, haulte, moyenne et basse oudit cloistre et hostelz canoniaulx de ladicte eglise estant dedans ledit cloistre, pourprise, circuicte et clausure d'icellui, selon ce que ycellui cloistre se extend et comporte nuement soubz ledit ressort et souveraineté dudit monseigneur le roy audit bailliaige de Saint Pere le Moustier, oudit lieu et siege de Centquoins, voulans et desirans de nostre cuer les droiz, prerogatives immunités et libertez de ladicte eglise estre conservez et gardez sans iceulx corrompre ne enffraindre ne souffrir estre corrumpuz ne enftrains

Sic pour enfrains.

, avons voulu et consenti, voulons et consentons par ces presentes par yceulx a nous ne a noz successeurs ducz de Berry et seigneurs de ladicte ville de Bourges, non avoir ne torner aucun prouffit ne avoir torné aucun prejudice ne consequance et yceulx estre tenuz pour non faiz et non advenuz, mais iceulx commandemens, mainmises, exploiz faiz par nostredit senechal et sergens dessus nommez ou autres noz officiers ainsy faiz de fait ou nom de nous et pour nous oudit cloistre, oudit hostel canoniaul ou demore ledit maistre Jehan de Chery en tant que nous povons de l'auctorité royal dont nous usons en ceste partie en tant que mestier est, avons mis et mectons au neant.

Et en oultre mandons, commandons, deffendons et enjoignons par ces mesmes presentes a nostredit senechal et procureur, sergens et autres noz officiers de nostredit paÿs de Berry presens et advenir quelxconques et a chascun d'eulx si comme a lui appartendra que lesdiz doyen et chappitre de ladicte eglise en leurdicte justice et juridicion quelxconques dudit cloistre de Bourges ne perturbent ou empeschent en aucune maniere,

car ainsy le voulons et nous plaist estre fait et aux dessus diz complaignans de ladicte eglise de Bourges l'avons octroyé et octroyons et de l'auctorité royal se mestier est,

non obstant quelxconques ordonnances et lettres, mandemens ou deffenses au contraire.

Donné en nostredicte ville de Bourges, soubz nostre seel, le xxe jour du moys de juing, l'an de grace mil quatre cens et unze.

Par monseigneur le duc et lieutenant.

Maulin.