1441, 5 août Tarascon (Château)

Mandement d'Isabelle de Lorraine, reine de Jérusalem et de Sicile, duchesse d'Anjou, etc., pour le paiement des mille florins de dot assignés par le roi René à Lionne de la Sellana de Brusa, suivant une convention passée avec son mari, Antoine de la Salle

Ysabel, Dei gratia Jherusalem et Sicilie regina, Andegavie, Barri et Lothoringue ducissa, comitatiuum Provincie et Forcalquerii, Cenomanie ac Pedemontis comitissa et in dictis Provincie et Forcalquerii terrisque adjacentibus regia vicaria et locuntenentes generalis, thesaurariis generalibus Provincie, necnon clavariis curiarum regiarum de Forcalquerio, Sistarici... presentibus et futuris et eorum cuilibet, gratiam et bonam voluntatem.

Cum pro solucione et satisfacione mille florenorum monete Provincie in dotem constitutorum et assignatorum per metuendissimum dominum meum regem nobili domicelle Lione, uxori magnifici Anthonii de Sala, consiliarii regii atque nostri dilecti, habendorum quidem et percipiendorum super juribus laudimiorum et trezenorum ac super juribus retencionum nostre curie competentibus in dictis vicaria Forcalquerii ac bajuliis Sistarici, Mosteriarum, Digne, Gastellane, Collismarcii, Guillelmi et Sancti Pauli Vencesii, appunctatum fuerit inter nos et dictum Anthonetum de la Sala, presentibus et consencientibus magistris racionalibus magne regie curie, ut actentis oneribus occurentibus curie regie propinque, opus est ut de parte dictorum proventuum, tam pro gagiis magistrorum racionalium exsolvendis, quam pro aliis negociis regiis succurratur et subveniatur, dictus Anthonius seu ipsa nobilis Liona dicta jura uno anno integraliter recipiat per manus vestras, incipiendo die prima mensis novembris proxime futuri, anno finito et completo jura ipsa pro ipsis gagiis magistrorum racionalium et aliis oneribus more cedant per alium annum inde sequentem, et ipso anno revoluto dictus Anthonius seu dicta uxor ejus dicta jura iterum habeat alterius anni, donec eidem Lione de dicta summa mille florenorum fuerit integraliter persolutum et satisfactum.

Igitur in executionem dicti appunctamenti, volumus et vobis tenore presencium, cum deliberacione regii nobis assistentis consilii, precipimus et mandamus quatinus prefatis Anthonio et Lione, seu ejus (sic) legitimo procuratori, peccunias dictorum jurium que proveniunt a die prima maii proxime preteriti nunc usque, et que provenient exinde usque primam diem maii proxime futuri, sive infra unum annum finiendum prima maii venientis quo computabitur millesimo quadringentesimo quadragesimo secundo, proveniendorum, alternis annis, quousque de dicta summa mille florenorum in dotem pro dote (sic) constituta et assignata eisdem fuerit integraliter satisfactum et exsolutum, tradatis et exsolvatis, vestrumque quilibet, prout ad eum spectabit, tradat et exsolvat integre et sine diminucione et contradicione quibuscumque...

Datum in Castro nostro Tharasconis, per magnificum virum Jeronimum de Mirabollis, de Neapoli, juris utriusque professorem, curie camere summarie regni Sicilie presidentem, majoremque et secundarum appellacionum et nullitatum comitatuum Provincie et Forcalquerii predictorum judicem, consiliarium regium atque nostrum dilectum, die quinta mensis augusti, anno Domini millesimo quadringentesimo quadragesimo primo.

Per reginam, domino senescallo Provincie, domino Valliscluse...

Gratis Registrata.

Matheus