1382, 7 juilletSaint-Haon

Louis, duc de Bourbonnais etc., octroie la capitainerie du Fay à Gauvain Michaille pour la tenir aux gages annuels de cinquante francs d'or qui s'ajoutent aux autres gages habituels.

Loÿs, duc de Bourbonnois, conte de Clermont et de Foroiz, per et chambrier de France, a touz ceulx qui ces presentes lettres verront, salut. Savoir faisons que nous, pour consideracion des bons et agreables services que faiz nous a ou temps passé nostre amé et feal escuier Gauvain Michaille, fait de jour en jour et esperons qu'il nous face ou temps a venir, a ycellui avons donné et donnons de certaine science et grace especial la capitainerie de nostre chastel du Fay

Le Fay : Loire, ar. et c. Saint-Étienne, com. Saint-Jean-Bonnefonds.

, a la tenir par lui aux gaiges, pproufiz et esmolumens accoustumez tant comme il nous plaira. Et avec ce en oultre lesdiz gaiges, proffiz et emolumens, lui avons donné la somme de cinquante franz d'or a prendre par lui pour un chascun an doresenavant, tant comme il sera capitaine dudit lieu ou tant comme il nous plaira, sur nostre tresorier de Forez. Si donnons en mandement a nostre bailli de Foroiz que nostredit escuier face et souffre joïr et user dudit office et desdiz prouffiz et emolumens et lui face obeïr par touz noz subgez en tout ce qui oudit office de capitaine appartient, puet et doit appartenir. Et avec ce mandons a nostre tresorier de Foroiz que lesdiz L francs paie doresenavant audit escuier par chascun an aux termes et par la maniere que les gaiges et pensions de nostredicte conté se paient ; et par rapportant copie de ces presentes soubz seing de notaire et quittance de nostredit escuier, nous voulons ce que nostredit tresorier poié aura pour ceste cause estre alloué en ses comptes et deduit de sa recepte par noz amez et feaulx genz de noz comptes sanz difficulté et sanz autre mandement attendre. Donné en nostre ville de Saint Haon

Saint-Haon-le-Châtel : Loire, ar. Roanne, ch.-l. c.

, soubz notre seel, le VIIe jour de jullet, l'an de grace mil CCC IIIIXX et deux.