1379, 14 juinMoulins

Louis, duc de Bourbonnais etc., prolonge d'un an l'autorisation accordée aux habitants de Gannat de lever un barrage sur les produits passant par la ville, dont l'argent récolté servira à la réparation et à la fortification de la ville.

Loÿs, duc de Bourbonnois, conte de Clermont et de Forez, per et chamberier de France, a tous ceulx qui ces presentes lettres verront, salut. Comme nous par noz autres lettres eussions donné et octroyé a noz amez les consuls, bourgois et habitans de nostre ville de Gannat

Gannat : Allier, ar. Vichy, ch.-l. c.

le barrage sur toutes choses passans par nostredicte ville en certaine fourme et maniere et jusques a certain temps plus a plain contenu en nozdictes lettres pour tourner et convertir l'argent qui en ystoit en la fortificacion et reparacion de nostredicte ville et non ailleurs, et le temps contenu en nozdictes lettres soit fini ou au mains finera briefment, si nous ont humblement supplié que, comme en ladicte ville conviegne plusieurs reparacions qui sont neccessaires de faire en la fortesce d'icelle, lesquelles reparacions il ne pouvoient faire se il n'avoient cellui barrage, nous le temps contenu en nozdictes lettres leur vueillons prolongier jusques a tel temps qu'il nous plaira, savoir faisons que nous, pour consideracion de ce que dit est, a iceulx consuls, bourgois et habitans avons octroyé et octroyons que jusques a un an a compter du jour que finera le temps contenu en nozdictes lettres a eulx sur ce autrefoiz octroyees il puissent lever icellui barrage, par la fourme et maniere que par vertu de nozdictes lettres il l'ont autrefoiz levé, et que par nozdictes lettres octroyé leur avons pour tourner et convertir l'argent qui en ystra en la fortificacion et reparacion de nostredicte ville et non ailleurs. Si donnons en mandement a nostre bailli et Bourbonnois et a tous noz autres justiciers que lesdiz consuls et habitans facent et sueffrent joïr et user de nostre presente grace sans les molester au contraire. En tesmoing de ce, nous avons fait mectre nostre seel a ces lettres qui furent faictes et donnees a Moulins, le XIIIIe jour de juing, l'an de grace mil CCC LXXIX.