1455, 12 décembreMoulins

Charles, duc de Bourbonnais et d'Auvergne, etc., donne le régime et gouvernement des écoles de la ville de Saint-Bonnet-le-Château à Audry Midroyn, depuis la Saint Jean Baptiste 1456 jusqu'à la même fête en 1459, au lieu et place de maître Pierre Ligier, qui l'avait également tenu pendant trois ans.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel-Chinon, per et chambrier de France, a noz balli et president de Fourez, ou a leurs lieuxtenant, salut. Comme par don et octroy par nous fait du regiment et gouvernement des escolles de nostre ville de Saint Bonnet le Chastel a maistre Pierre Ligier par le temps et terme de trois ans declairés en nos lettres patentes sur ce faites icellui maistre Pierre ait eu ainsi regiez lesdictes escolles par lesdiz trois ans, et seront escheuz iceulx trois ans a la feste saint Jehan Baptiste prouchain venant, savoir vous faysons que nous, volans pourveoir esdictes escolles de personne ydoene et souffisante, confians a plain des sens, loyaulté, prudomie, souffisance et bonne diligence de maistre Audry Midroyn, et pour la bonne relacion que faite nous a esté de sa personne, a icelui maistre Audry avons donné et ocroïé, donnons et octroïons par ces presentes le regime et gouvernement desdictes escolles, a icellui avoir, tenir, regir et garder par pareil temps et terme de trois ans a commencer de la feste de saint Jehan Baptiste prouchaine venant, et fenissant a ladicte feste lesdiz trois ans revolus que l'en dira mil IIIIc LIX, aux gages, salayres, honeurs, previleges, prerogatives, preheminences et esmolumens acoustumez et qui y appartiennent. Si vous mandons, et a chascun de vous, et comme a lui appartiendra, que, prins et receu dudit maistre Audry Midroyn le serement acoustumé de faire en tel [cas

Oubli du copiste.

], vous le mettez et instituez, ou faciez mettre ou instituer en possession et saisine desdictes escolles si a ce est ydoene et souffisant, et des gages, droiz, prouffiz et esmolumens dessudiz, le faites, laissez et souffrez joïr et user devant ledit temps pleinierment et paisiblement, sans luy faire ou donner, ne souffrir estre fait ou donné auccun empeschement au contraire. Donné en nostre ville de Molins, le XII jour de decembre, l'an de grace mil CCCC LV.