1402, 3 juilletMontbrison

Louis, duc de Bourbonnais etc., augmente de 300 livres tournois la pension annuelle de 1 200 livres tournois qu'il sert à sa tante Jeanne de Forez, comtesse de Forez, et mande au trésorier de Forez de s'acquitter dudit versement.

Loÿs, duc de Bourbonnois, conte de Fourez, baron et seigneur de Beaujeu, per et chamberier de France, a touz ceulx qui ces lettres verront salut. Comme de pieça nous eussions ordené et ottroié a nostre tres chiere et tres amee tante Johanne de Bourbon, contesse de Fourez, douze cenz livres tournois de annuelle pension, oultre et par dessus la despense ordinaire de son hostel, pour yceulx douze cenz franz convertir a paier

écrit deux fois sous la plume du copiste.

les gaiges d'aucuns ses officiers, ses vestemens, aumosnes et ses autres neccessités et despenses extraordinaires, et il soit ainssi que les diz douze cenz franz ne se souffissent pas a paier et parfournir les choses dessus dites, a quoy yceulx douze cenz franz estoient ordennez convenablement selon qu'il affiert a son estat. Savoir faisons que nous, ces choses considerees, voulens l'estat de nostredite tante estre honnestement maintenu et soustenu, et supplir de tout nostre povoir aux fautes qui y pouroient a venir comme tenuz sommes, tant naturelement et de prouchaineté de linage comme autrement, a nostredite tante avons acreu et acroissons sadite pension tant ordinaire comme extraordinaire la somme de trois cens livres tournois par an a prendre et avoir par nostredite tante, ycelles trois cens livres tournois chascun an sa vie durant, oultre et par dessus lesdites pension et toutes autres assignations et dons quelconques par nous a elle faiz pour la despense de son hostel ordinaire et extraordinaire ou autrement, c'est assavoir a la fin de chascun mois de l'an vint et cinq livres tournois de et sur les deniers de la recepte de nostre tresorier de Fourez. Si donnons en mandement par ces mesmes lettres a nostre tresorier de Fourez present et qui par le temps avenir sera que a nostredite tante ou a son certain commandement chascun an doresenavant sa vie durant paie, baille et delivre lesdiz trois cenz franz de pension, oultre et par dessus les pension, dons et assignacions dessus diz aux termes que dit est, et par rapportant vidimus de ces presentes pour une fois et quittance de nostredite tante sur ce il nous plaist et mandons tout ce que pour ladite pension aura esté paié soit alloué aux comptes dudit tresorier et rabatu de sa recepte par noz amez et feaulx genz de noz comptes a Montbrison par tout ailleurs ou mestiers sera, non obstant ordennances, mandemens ou deffenses au contraire. En tesmoignage de ce, nous avons fait mettre nostre seel a ces presentes donnees en nostre ville de Montbrison, le IIIe jour de juillet, l'an de grace mil quatre cens et deux.