1402, 27 juinMontbrison

Louis, duc de Bourbonnais etc., nomme Bertrand Chalp capitaine-châtelain de Saint-Maurice à la place de Guillaume Fillet, déchargé et pourvu d'un autre office, et mande à son bailli de l'instituer dans l'office de capitaine-châtelain après avoir reçu le serment de l'intéressé.

Loÿs, duc de Bourbonnois, conte de Fourez, baron et seigneur de Beaujeu, per et chamberier de France, a touz ceulx qui ces lettres verront, salut. Savoir faisons que, pour le bon et convenable rapport a nous fait de la personne de nostre bien amé escuier Bertrant Chalp, nous, confianz a plain de son senz, loyauté et bonne loyauté

erreur B. Selon toute vraisemblance, A comportait bonne diligence.

, ycellui Bertrant avons fait, ordené et establi et par ces presentes faisons, ordennons et establissons capitaine et chastellain de nostre chastel et mandement de Saint Morise

Saint-Maurice-en-Roannais : Loire, ar. et c. Roanne.

et des autres sieges appartenans audit mandement, ou lieu de Guillaume Fillet, lequel nous avons deschargié dudit office et pourveu d'un autre, auquel Bertrant nous avons donné et donnons plain povoir et mandement especial de tenir ledit office ainssi et par la maniere que ledit Guillaume Fillet l'a tenu jusques a present, de faire et excercer tout ce que y appartient et que a bon et loyal capitain et chastellain puet et doit appartenir, aux gaiges, droiz, prouffiz et emolumens, franchises et libertés oudit office appartenant tant comme il nous plaira. Si donnons en mandement par ces mesmes lettres a nostre bailli de Forez ou a son lieutenant que, receu dudit Bertrant le serment accoustumé faire en tel cas, il mecte et institue ou face mectre et instituir en possession et saisine dudit office, et d'icellui avec les dessus diz droiz, prouffiz et emolumens, franchises et libertés, le face, laisse et sueffre joïr et user plainement et paisiblement et obeïr de tous noz subgez aux choses touchant et appartenant audit office. Mandons aussi a nostre tresorier de Forez et receveur ou prevost de Saint Morise presens ou qui pour le temps avenir seront et a cellui d'eulx a qui il appartiendra que lesdiz gaiges paient, baillent et delivrent audit Bertrant chascun an doresenavant aux termes et par la maniere accoustumez, et nous voulons que, par rapportant vidimus de ces presentes pour une fois et quictance souffisante dudit Bertrant, tout ce que pour lesdiz gaiges aura esté paié soit alloué aux comptes et rabatu de la recepte desdiz tresorier et prevost ou de cellui d'eulx qui paié l'aura, sanz contredit aucun, par noz amez et feaulx genz de noz comptes a Montbrison. En tesmoing de ce, nous avons fait mectre nostre seel a ces presentes. Donné en nostre ville de Montbrison, le XXVII jour de juing, l'an de grace mil IIIIC et deux.