Charles, duc de Bourbonnais et d'Auvergne, etc., commet Antoine Symon, clerc, a regir, tenir et gouverner les écoles de Saint-Germain-Laval, en remplacement de Thomas Poyet, qui en avait délaissé la gestion et nommé à sa place Mathieu Rantais, qui avait à son tour délaissé lesdites écoles.
Charles, duc de Bourbonnais et d'Auvergne, etc., commet Antoine Symon, clerc, a regir, tenir et gouverner les écoles de Saint-Germain-Laval, en remplacement de Thomas Poyet, qui en avait délaissé la gestion et nommé à sa place Mathieu Rantais, qui avait à son tour délaissé lesdites écoles.
Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chambrier de France, a nostre balli et president de Fourez, ou a leurs lieuxtenans, salut. Comme des l'an mil CCCC L nous heussions donné a Thomas Poyet, clerc, le regime et gouvernement des escoles de nostre ville de Saint Germain, lequel a deleissé lesdictes escoles despieça et mist et institua en son lieu Mathieu Rantais, lequel a semblablement délaissé lesdictes escoles, et pour ce que de toute ancienneté a nous appartient la donacion et provision desdictes escolles, esquelles est besoign de pourveoir de personne souffisante et ydoene pour le bien, utilité, instruccion et endoctrinement des enfans et escoliers qui viendront et ont acoustumé de venir auxdictes escoles, pour ce est il que nous, confians a plain des sens, science, traditure et bonne diligence de nostre amé Anthoine Symon, clerc, et pour le bon rapport qui fait nous a esté de sa personne, a icellui avons commis et ordonné, comectons et ordonnons par ces presentes a regir, tenir et gouverner lesdictes escolles de nostre ville de Saint Germain, jusques a trois ans prochains venans. Si vous mandons, et a chascun de vous comettons par ces presentes, que ledit Antoine Symon vous mettés et institués en possession et saisine desdictes escolles de Saint Germain et excercice d'icelles, et l'en faciés, laissés et seuffrez joïr et user plainierment et paisiblement durant ledit temps, s'il est a ce souffisant et ydoene, en oustant et deboutant tout autre illicite detenteur d'icelles escoles non aïant nos lettres sur ce en date precedans ces presentes. Donné en nostre ville de Molins, le dernier jour de juillet, l'an mil CCCC LV.
Par monseigneur le duc a la relaccion du conseil.
Regnart.