1445, 12 juilletNS

Quittance de Charles, duc de Bourbonnais et d'Auvergne, etc., à Martin Roux, receveur pour le haut pays d'Auvergne d'une portion d'une aide de trois cent mille francs, pour deux cent cinquante francs tournois accordés par le roi à l'intention de Jean de Clermont, fils du duc, alors en campagne pour le roi.

Nous Charles, duc de Bourbonnoys et d'Auvergne, comte de Forestz, seigneur de Beaujeu et de Chastel Chinon, per et chamberier de France, confessons avoir eu et receu de Martin Roux, receveur ou haulx paÿs d'Auvergne de la porcion de l'aide de IIIc M francs mis sus par monseigneur le roy en ses paÿs de langue d'oïl ou mois de janvier derrenier passé, la somme de deux cens cinquante livres tournois pour la quarte partie de la somme de M f. t. que monseigneur le roy, par ses lettres patentes donnees a Nancey en Lorraine le XXVIIe jour dudit mois de janvier, avoit et a ordonné estre mise sus es hault et bas pays d'Auvergne oultre et pardessus le principal et fraiz dudit aide, et icelle nous estre baillee, pour et ou nom de nostre tres chier et amé filz le conte de Clermont ou a icellui, auquel mondit seigneur par sesdictes lettres a donnee et octroyee ladicte somme de M f. t. pour lui aider a entretenir plus honorablement son estat en la compaignie et service où il est continuelment de son ordonnance, et la despence que faire et supporter lui convient en icellui, de laquelle somme de IIC L f. t. nous nous tenons, pour et au nom de nostredit filz, pour contens et bien paiez, et en avons quitté et quittons ledit Martin Roux et tous autres. En tesmoing de ce, nous avons fait mectre nostre seel a ces presentes le XII jour de juillet l'an mil CCCC quarante et cinq.