Quittance d'Agnès, duchesse de Bourbonnais et d'Auvergne, à Pierre Mandonier, receveur du bas pays d'Auvergne d'une aide de vingt-huit mille livres, de la somme de mille livres tournois accordée par les gens d'église et nobles dudit pays.
Quittance d'Agnès, duchesse de Bourbonnais et d'Auvergne, à Pierre Mandonier, receveur du bas pays d'Auvergne d'une aide de vingt-huit mille livres, de la somme de mille livres tournois accordée par les gens d'église et nobles dudit pays.
Nous Agnes de Bourgoingne, duchesse de Bourbonnois et d'Auvergne, confessons avoir eu et receu de Pierre Mandonier, receveur ou bas païs d'Auvergne de la porcion d'un aide de XXVIIIM livres pour le roy nostre sire, et VM pour monseigneur le duc dudit Bourbonnois et d'Auvergne, et pour nous octroïé par les gens des trois estats dudit bas et hault païs d'Auvergne assemblez en la ville de Montferrant ou mois de novembre derrenier passé, la somme de mil livres tournois, laquelle les gens d'esglise et nobles dudit bas païs nous on donnee et ordonné a nous estre paiee, baillee et delivree par ledit receveur des deniers de sa recepte, pour les causes et ainsi qu'il est contenu et declairé es instructions et ordonnances par eulx faictez sur le fait dudit aide, de laquelle somme de mil livres tournois nous nous tenons pour bien contans et paiez, et en avons quitté et quittons ledit Pierre Mandonier, receveur dessusdit, et tout autre a qui quittance en appartient. Donné en tesmoing de ce soubz nostre seel, le premier jour de fevrier, l'an mil CCCC quarante et ung.
Par madame la duchesse,
Chapperon.