1366, 10 septembreSouvigny

Louis, duc de Bourbonnais etc., octroie aux habitants de Verneuil un marché tous les mardis et, outre les foires accoutumées, une foire extraordinaire le jour de la Saint-Barnabé, et il promet à tous ceux qui viendront résider audit lieu exemption de toutes prises de blé, vin, bétail et autres biens, si ce n'est pour juste et loyal prix.

Nous Loÿs, duc de Bourbonnois, conte de Clermont, per et chamberier de France. Savoir faions a tous presens et avenir que par les bons et agreables services que nous ont fait noz hommes, borgois et habitans de nostre ville de Verneul

Verneuil-en-Bourbonnais : Allier, ar. Moulins, c. Souvigny.

et noz autres hommes circumvoesins et que nous esperons qu'il nous facent par le temps avenir, et aussi veu en ce et consideré nostre proffit et le leur par le temps present et par cellui a venir, leur avons octroié et de certaine science et octroyons de grace especial par nous et par noz successeurs avenir que lesdiz hommes et borgois et autres qui sont retraiz ou retrairont tant par le temps present comme par cellui avenir dedans nostredicte ville et en la place qui fut au vigier de Verneul assise entre la maison qui fut Jehan des Box et nostre chastel de Verneul, icelle premierement faire fort

sic.

puisse faire tenir et avoir marché toutes les sepmaines doresenavant

écrit doresevant.

, c'est assavoir le mardy, et avecques ce les foires acoustumees, et oultre celles une foere le jour de la feste Saint Bernabé chacun an, lesquelles foeres et marchés et tous ceulx qui les tiendront et leurs danrees alant, venant et demourant en icelles, nous prenons et mectons en nostre sauvegarde et de noz successeurs perpetuellement. Et voulons qu'il ne soient esdictes foeres, marchés ne ou conduit adjournez, gaiges pris ne arrestez se ce n'estoit pour cas criminel, choses obligees, cas de present ou fait despendens desdictes foeres et marchés. Item avons donné et octroyé a nosdiz hommes et bourgois et a tous autres presens et avenir qui auront retrait ou se retrairont dedans nostrediz chastel, ville et place dessus diz, icelle premierement soit comme dit est, qu'ilz soient francs, quictes et exemps de toutes prises de blez, vins, bestail et autres biens que nous ou nostre successeur avenir devrions ou pourrions fere par nous ou par noz gens dedans le chastel, ville et place dessus diz, se ce n'estoit par les despens de nous et de noz successeurs a despendre dedans nostredit chastel et forteresse par just et loyal pris. Lesquelles choses dessus dictes et une chacune d'icelles leur avons octroyee et octroyons et voulons en grace especial qu'elles soient en ferme et perpetuelle valeur. Et deffendons a tous les officiers de nous et de noz successeurs tant es presens comme a ceulx avenir que contre la teneur de ceste presente lectre et grace ne facent au contraire, maiz d'icelles les laissent joÿr paisiblement. Et se aucuns faisoient le contraire, son exploit voulons estre nul et de nulle valeur. Et promectons par nous et par noz successeurs avenir en bonne foy les choses dessus dictes tenir et avoir fermes et non souffrir riens au contraire. Ou tesmoing de laquelle chose, nous avons seelees ces presentes lectres de nostre grant seel, faictes et donnees en nostre ville de Souvigny, le dixieme du mois de septembre, l'an de grace mil trois cens soixante et six.