1456, 10 juinMoulins (Château)

Charles, duc de Bourbonnais et d'Auvergne, etc., nomme maître Jean Blanc au régime et administration des écoles de Saint-Bonnet-le-Château pour trois ans.

Charles, duc de Bourbonnois et d'Auvergne, comte de Clermont et de Fourez, seigneur de Beaujeu et de Chastel Chinon, per et chamberier de France, a nostre balli de Fourez ou a son lieutenant, salut. Savoir vous faisons que pour la bonne relacion qui faite nous a esté de la personne de maistre Jehan Blant, nous, confians a plain de ses sens, loyaulté, prudence, discretion, souffisance et bonne diligence, a icellui avons donné et octroïé, donnons et octroïons de grace especial le regime et administration des escolles de nostre ville de Saint Bonnet le Chastel pour trois ans commençant a la feste de saint Jehan Baptiste prouchaine venant, et finissant a ladite feste lesdiz trois ans revolus, aux gages, droiz, prouffiz et esmolumens acoustumés et qui y appartiennent. Si vous mandons que, prins et receu dudit maistre Jehan Blant le serement acoustumé de faire en tel cas, vous le mectés et institués, ou faittes mettre et instituer en possession et saisine desdictes escolles et d'icelles ensemble des gages, droiz, prouffiz et esmolumens dessusdiz, vous faittes, laissez et souffrez joïr et user plainierment et paisiblement, en ostant et debotant tout autre illicite detenteur desdiz escolles non aïant nos lettres precedans en date ces presentes, car ainsi nous plaist il et volons estre fait. Donné en nostre chastel de Molins, le Xe jour de juign, l'an de grace mil CCCC LVI.