342

1455, 8 aout. — Chevagnes.

Charles, duc de Bourbonnais et d'Auvergne, etc., nomme Guiot de Chastelneuf, écuyer, seigneur de Leignec, à l'office de capitaine de Montbrison, vacant par le décès d'Amé Vert.

A.Original perdu.

B.Copie sur papier dans un registre de la Chambre de Forez. 285 x 405 mm. Archives départementales de la Loire, B 1844, folio n° 25 recto.

Analyse :Inventaire-sommaire…, Loire,…, II, p. 79.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plein des sens, science, prudence, vaillance, loyaulté, preudomie et bonne diligence, et pour les louables et commandables vertus estans en la personne de nostre amé et feal escuyer Guiot de Chastelneuf, seigneur de Leygnec, a icelluy avons donné et octroyé, donnons et octroyons de grace especial par ces presentes l'office de cappiteyne de nostre ville de Montbrison, en nostre conté de Fourez, a present vaccant par le decés et trespassement de feu messire Amé Vert, derrenier detenteur et possesseur dudit office, pour icelluy office de cappitaynne de nostre ville de Montbrison avoir, tenir et excercer doresenavant par ledit Guiot de Chastelneuf, segneur de Leygnec, aux gaiges, drois, prouffiz et emolumens acoustumez et audit office appartenans, tant qu'il nous plaira. Si donnons en mandement par ces presentes lettres a noz amez et feaulx chanceller et gens de noz comptes, a chascun d'eulx comme a luy appartiendra, que, prins et receu dudit Guiot de Chastelneuf, segneur de Leygnec, le serement acoustumé de fere en tel cas, ilz le mectent et instituent, ou facent mectre et instituer en possession et saysine dudit office de cappitaine de nostre ville de Montbrison, et d'icelluy office (a) ensemble desdiz drois, gaiges, prerrogatives, preheminences, prouffiz et emolumens acoustumez et audit office appartenans, il le facent, laissent et seuffrent jouyr et user playnement et paysiblement, et a luy obeÿr de toutes choses audit office de cappitainne de nostre ville de Montbrison appartenans, en oustant et deboutant d'icelluy office tout autre illicite detenteur non ayant sur ce nos lettres en date precedans ces presentes, es quelles, en tesmoing de ce, et a plus grant fermeté, nous avons fait mettre et appouser nostre seel. Donné a Cheveygnes le VIII e jour d'aoust l'an de grace mil CCCC LV — par monseigneur le duc — Millet.

a. Et d'icelluy office répété.